سعدات لي صام سيدنا رمضان

سعدات لي صام سيدنا رمضان

سعدات لي صام سيدنا رمضان.... بالتقوى والايمان جاد الرب عليه

سعدات لي صام بالطيب والاحسان.... سعداته بالصيام يا سعده بيه

سعدات لي صبر و ضاعف ليمان....هاذ الشهر اليوم غدوة يشهد ليه

الصلا فرضها ربي من لركان....يا سعد لي قام فالليل يناجيه

يا سعد لي صلى صلاته بالاتقان...عند الله     غدوة   تشفع فيه

يا سعد لي تلى ايات   القران....كتاب الله كل لفضال تجمعو فيه

يا سعد لي قرى سيرة العدنان....ودار خصال محمد قدوة ليه

يا سعد لي غض طرفو من لعيان....ما يرى فاللي حرمها الرب عليه

ما يتبع عورات خواته النسوان....عين الله ما تنامشي لبدا تحضيه

يا سعد لي حجر فالفم   اللسان.... ما يهدر فالناس لا حد ياذيه

ما يغتب ما ينمم قال    فلان.... ما يكلش لحمهم خضر بين يديه

يا سعد   لي إيفرح    الصبيان.... يكرم عيالو وجميع   لي ليه

يا سعد لي يصدق   في رمضان.... بالسترة يخفي ما عطات يديه

الصدقة تزيد فالزرق يا إخوان.... مولاها تحد   الباس    عليه

صلة الرحم واجبة على الانسان.... قالو تزيد للعمر بالبركة فيه

يا سعد لي قام بهاذ   الاركان.... واضب فالعمل وحافض عليه

غدوة يسكن     فخيار    الجنان.... وجدو ربي لعبدو يسكن فيه

لا تحرمنا يا الله ويا    حنان.... وبفضلك جود على عبدك عليه

نختم بالصلا على سيد الرسلان.... . محمد لمين   صلى الله عليه

والشاعر الناظم    ذ الميزان.... عبد الله من النار يا ربي تحميه

عبد الله بحوصي
27.07.2013