حكـــــــــــــــــــــــــــــم الغاب

هاذي غابة وحكمها قانون الغاب
**من واجب سكانها ڤاع تهابو

يسكن فيها ضعيف وامخالب ونياب
**طاير واللي زاحفة فوڤ ترابو

و كاين ثاني لي معاشر في لعلاب
**واللي داير سكنتو في زردابو

العاقل في قومنا ماهوش صواب
**والبهلول اليوم موزون صوابو

مصغرنا وسط الڤماطة راه شياب
**واللي فات القرن زاهي بشبابو

ركبتنا غمة على غبنة و ضباب
**وقيلة هذا من الوقت عڤابو

ياغالط في وقتنا ضنك يخياب
**غرك هاذ الجيل ما درت حسابو

من وسط الظلمة ايضوي لك شباب
**ماتديه الموت يصعب تهيابو

مصيودة ماحضات من صيّاد تهاب
**مستفتي حيران ماصاب جوابو

لا ملة لادين في الغابة يتهاب
**كل آخر منهيه يفتي بكتابو

ولد لبية تهان في التصنيف وراب
**خنفوس و ديدان سكنت محرابو

و الخنزير حضى الحاكم في لقطاب
**و ثعالب و ذياب ديوان كلابو

والعود اللي كان بالطرحة وركاب
**راه محلّس وتفر بان طيابو

سبع الهدة ما بقى فالبر و غاب
**فيه طمع لغراب جرَّب منڤابو

حت البوم حضى يفنن فالخطاب
**وحمير يغنو على حضر جنابو

هاليه اللفعة تحاكم فا لنصاب
**و شوادة و لات  للمال ربابو

والديك بلاصلى يأذن فوڨ ڤباب
**و يحلل في الطيبة غي لڤرابو 

دارو فكرونة تعلم في الشباب
**لازمكم شمعون تحضاو احبابو

حتى كلب الما حضى قافز لعاب
**جوف الارض وليه منتوج جبابو

ڤالو عود الكرس لازم له يشحاب
**تتهد العودة على زين اركابو

تنتج منها صيل ينفع في لتعاب
**عڤرت بغلة وليد شيهان وجابو

كلش جايز غير تتخلط لنساب
**وهداك من الخر لحية و احجابو

و الطاعة لصحاب قوة من لغراب
**ذوك اللي علاو ذا العلم انهابو

واستغفرالله راهو ڤلبي طاب
**يغفرلي زلات من فمي رابو

تتسڤم لحوال باذنك يا وهاب
**ترشدنا لطريڤ طه و اصحابو

# دين-نعيمي

السلام عليكم