جيري فيل هو الإسم الذي عرفت به البيّض إبان الإحتلال الفرنسي
و قد تغيّر بها كل شيئ و أرقنا ذلك و و من عادتي أنني لا أذهب إلى وسط
المدينة إلا نادرا و في أحد الأيام نزلت و أفزعني حقا ما رأيت فقد تغير كل
شيئ و شانني ما رأيت و سمعت و شعرت و كأني غريب في أوطاني فرجعت و كانت
قصيدة جيري فيل
و قد رفعتها إلى المنتدى مقزوءة و معموعة على شكل ملف صوتي

GERYVILLE
جيري فيل
[center]ضاقت روحي في بلادي يا راجل****و اشتاقيت وجوه في مدّة قابو

ربت نمهّل في خطاوي مترجـّل****و نكاحل لوجوه طامع ينصابو

يا تهواسي ذا البيّض ولاّ تـل****اهملت ولا نعّات نفهم لجوابــو

واضرم مشعال في قلبي شعلـل****واتنهت وزاد قلبي تلهابـــو

نمشي ونشوف نخزر متأمــل****سبحانه حاكم الدّهر و قلاّبــو

لا من يفهم لوقتي ليه انسوّل****و ظنوني في ولادي راهم خابــو

لاه الصقر يتيه حاله يتحلحل****و يضيعو من شاوهم راهم شابـو

لا وين يروح فالوقت يمهّــل****لا من لاهي بيه ضيّع شبابـو

هذا ساهي ذا مدقثر و مقفّــل****ذا رافد شكوات رايب لشعبـو

البيّض يبليك برزيّة تشعــل****ولاّ حملة قاوية و رعد بسحابـو

تتركب لبراج و بلادك تحمـل****يتربطو ويدان شاوك و عقابـو

و يهيج كسال بودرقة يرحــل****و يريب عليك تدرق بترابــو

سونامي اليابان سومطرة تنـزل****زلزال المحيط يهجم بخرابـو

يرميك الطوفان بحجارة ووحـل****تتصبح في كان لمّاير قابــو

شوف الجمعيّات بسماها تذهل****و المسؤول صحيح رافد كرطابو

دراهمهم كي الما في باسان رمل****ولاّ حاسي قامقة طوّل تكتابو

هذا مرض صعيب والوقت تحوّل****وسلاكه بالطّيب يرجع لصوابو

البنت زواجها ميزان متلتـل****و شروط امّاتها قاع صعابـــو

يا راجل يهديك خمم و استعقـل****و الرّيش يلا طال يلزم تقصتبو

المهرة بالعز مهدودة لفحــل****و لكيدارة لحمار و يطيّح نابــو

قال الشّاوية قال حلّو لا تمهـل**** لرّخس أماليه هوما ينصابــو

وسطيف نسى الفوّارة وارحل****و بقاو عجاج بيّضنا وعلابـــو

ونساوين دراس ذي تقاشر وتحلّل*و لخرى قي تسقسي ما جابـــو

ذي كردات و نادمة جات اتبدّل****مايطعنهم قي لي ربي صابــو

السايل عن نسبتي خفته يحصل****راه لساني يكويه و يعضّه كلاّبو

بعدني راه قلبي قادي زاد شعل*****و نصيبك بحديث يبكم طبابـو

كل خميس يموج لبلادي هامـل****ومتلّف دارهم ناسو وقرابــو

وجهه مردوم بالقبرة ورمــل****و يساسي للفات لوطن جابـــو

راقد في ريدال ومعاشر لقمـل****ياكل في حمّاس لكلاب تهابــو

من سوق النسى عيني تنهـل ****و دموعي هاطلة من خدّي رابـو

شمتونا قال ذا السوق يهبـّـل ****يا سعده من بات يلقى مكتابــو

جابوله لقفاف بالخير مكيــّل****و ما يرقدش الليل باسط بحبابـو

ذو ماهمش بناتنا خمّم يا عاقل****هاذو راعيّات من بكري سابــو

و ما ننساش لي تقدّم راه ردل****في كرعيها لبسته يتجرجر صابو

تابعها فالصمايم لطيور تقيّل****و مشومي لقفاف مقطوعين جنابـو

يجري كي الحاشي لمعقّـــل****تابع مولاه همساس عقابـــو

ولاد البيّض قي تقربهم تحصل****و يسوموك بضر يصعاب حرابو

كولو طيبات ذ الماعز لكحـل****و بلاك تقول للبيّض نسّابـــو

رانا متبرين والعاقل يفصـل****و القالط ردّوه يرجع لصوابــو

ولاد البيّض كلهم من صيل مصيل****سالو عديانا بشهادة قتابـو

حاشى جيري فيل وافهم ياعاقل****و ترابي نبقيه من شاوه لعقابو

والـــي لبلاد حشّمتك تعدل****و البيّض ليه ظفار هوما ندّابو

البيّض ولاّ عباية تتفصّــل****و رجعله كولون عوّل لخرابـو

قابو لكبار والرّاي تشرتــل****و محاو عرافنا لعوايد سابــو

رُد علينا علمنا والقاشي لوّل****و اتفكّر توراثنا عاون كتّابــو

ماني بزناس ماني مقــاول****و سال يلا نسال حفرة بترابـو

معليم و قاضني حالي يتحـوّل****و نسالك عاهدك يوفى بحسابو

اتفكر ليتام وعزايج كهّـل****واتفكر لمريض هالك بعطابــو

بكاني ذ القلب كي قادي يذمـل****ويعمّر مازال صابر لعذابـو

هذا طلبي ليك والمولى يقبـل**** واذا كنت كريم عجّل بوجابو

ما ردنا جردات ملقى لثمـّل****و حمار بمليار لوحوش تهابـو

سركلنا الحيوان فالدّخلة قبّل****و الخرجة زيد فالبيّض واعقابو

و الكيدار بتابعه للمير مقابـل****حاشى أميرنا فارس بركابـو

وتلفت لتعليم تاقت منه بـل****بانت من ليكون للمرحول رقابو

خارج من حيط بالقرس محمل****نجع الصحرة لشوارع رابو

البيّض راه ميت و مقسّــل****لا من يرثيه يضحك نحابــو

وين تروح براج مسركــل****والبيّـض خاوية يقطع نهابـو

هذا حبس كبير مولاه مبهدل****دعوة عالم مات مدفون كتابـو

قاع البندير مولاه يطبــل****و نهار الواحلة يسلك قصابــو

هجروه ماليه من شاوه لـوّل****هجرو من سكنوه حتى لمرابـو

ياكل ثمراتها من جا متجوّل****و مول الدار يقيب وقت لي طابو

يحشم ولد الدار عمره ما يخصل****و يقول فضايحي أهلي يتعابو

والراعي دعاروجهه يتقســل ****وي!!ّر فالفاتحة ليمام يهابـو

والسلفة ياك حرام ليهم يتحلّـل****والمفتي فالجماعة هوما خطابو

و الكنيسة بحجارها راه اتـحوّل****و بناوه فيلات سالو هرابـو

حطم تاريخنا عنّه ما جمّـل****ولي كانو شعوات في ضحوة رابو

ظنيته كولون بعساكر زلـزل****و القيادة واقفة يصعاب حرابـو

والمهبولة وين سلتك يا راجـل****تاريخ بلادنا يمحوه قرابــو

تروي عطشان وداّوي معتـل****و عسلها زولال سالو شرّابـو

كاذا من لحباب من دونك خلخل****و اهجر ما بان ومسات لقابو

اتشاقيت خبارهم سالو عنهم كل***واتوحشت نشوفهم كي قبتي قابو

خنقو شريان فالقلب تقفّـــل****بعدنكان سايل بنضابــــو

من ذ العين خفاف عقلي واتخبّل*حين يشوف مراسمه عزّه وشبابو

درقت بالحيطان وحديد مصلصل**يا ربي لا سماحة من كان سبابو

راه يهيم فالصّحرة يهمــل****يستخلى ينفوه أهلو وقرابـــو

يتمرمد و تزيد لعقايب تــردل****و يعيفوه منين يخطيه صوابو

راني محقور جهدي عنـي زل****و لحاقرني بالطول يلقى قلابو

كل سمينة راعية لبد ى تـهزل****و العرف يلا يبس يلقى حطابو

يا ظالم مولاك بالعزّة يتجـل****راه يجيك نهار و تشوف عذابو

قرّك منصب راه عنّك يتنقّـل****و الكرسي لو طال ينزل ركّابو

وعده راه يجيك ملكك يتزلـزل****يوم الساعة كلها ضايق بكتابو

سال جدودنا ياك لعياد تصيّل****واعروشي زينين جملة ما يتعابـو

فالصهلة قي رعد رد عيه جبــل****و يهيلم كيفان من دونه رابو

ينبر كي نشدّه جلّب ما يمهــل***ينشعني و يفز عجّج بترابــو

دقداق الفرساخ عقبه صار رمل****وحساب حوافره فالرملة قابـو

ما يعثر ما يكر!! بيا ما ينكل****يفعس دون الواد و يجيب عقابو

خزّة و ربيع ما يسيّر ما يمهل****ويعضعض فلازمة يشتي لعّابـو

ما كادوه علاب فالبر المرمل****و اشباك و قيفار عمرت بشعابـو

ياك نسرجو قي القارح لحجل****يتلفت ويشوف يحصي ركّابــو

مولاق و تازّينة تاريخ يخبّــل****ما تنساه فرانسا لطّول تهابــو

سال التّاريخ عنّا ما يقفـــل****ياك حنا ملينا صفحات كتابــو

سال قصورنا من لبعاد اطّل****استيتن و لقاسول كل شبر بقطابـو

شلالة بوسمقون وبساتين نخل****و بريزينا شاهدة مازال خرابـو

بنت الخص و شوف آثار المنزل****و بحاير ثامرة كانت بجنابـو

لكراكدة نجعها من بكري قبّل****و المشرية صقيرة ليها رابــو

بوعلام وسال عنّه قي ســوّل****ثمّ لقصور تعطيك جوابـــو

و زوينا منعة من جانا سايـل****سيدي الشيخ وفرعته فاتح بابـو

سيدي حمد بن حمزة لبطـل****ما دار بدولين فالصحرة قلاّبــو

بن خطاب فالزويرق يتحثّل****خولع كولومب كان فالموت سبابو

قدور بن حمزة لنّار يشعــّل****و ماقورة شاهدة لبرور تهابـو

قارة سيد الشّيخ والقشوة مثّل***ساداتي الرجال من بكري ينصابو

ما كاين هيهات من لينا يجهل****و يكمي نسبت البيّض وعرابو

لمهيدي في بلاده مسجون مكنبل***يطلب في مولاه ضعّف مكتابو

أنا ليا فالمحبة نشتي نتقزّل***من عز بلادي جاو ذ الكلمات كتابو

يا سلوة خاطري راني قي نهزل***و شيانت حالتي وجراحي عابو

قرّك مني قلب محكوم مسلسل****و معادي مولاه ما طاع وجابو

لبيض قاع شكاولي فالبعد يملّل*****و أنا والشّهبة جباله يقرابـو

ومايشقاش نزيد نختم ونكمل****وصلاة على نبينا ورضاة صحابو

و الطمعة فالهاشمي يوم المحفل****نتسضرى بيه يسترني بحجابو

بعداد الخلواة تمت ياعاقـل****نذكر سيدالشيخ متشوّق لرحابـو

ع مهيدي


المرفقات


http://www.zshare.net/audio/919654477621015a/

http://www.4shared.com/audio/nMEwM6IF/Gryville.html
[/center]