قصيدة زجلية -سبحانك يا رقيب-

-سبحانك يا رقيب-

سبحانك يا رقيب مجيب الطلبة ****يا صاحب الحق يا لي فيك رجانا
اطلبتك يا اله مجيب الطلبة ****من ذالوقت الشين انت تسلكنا
الواحد وعشرين سنين صعيبة ****قرن الافات بيه ا تنبهنا
قال عليه الرسول وقالو الصحابة***وقالو عليه العارفين شلى من معنى
قرن الكوارث نكبة على نكبة *****عصر الفتن بمحانو جانا
جات الزلازل ضربة على ضربة***اتهز العقول كان اتفيقنا
وجات البراكين ودارت اضبابة ****وشفنا الشي لي عمرو ما شفنا
فاضت البحور هزتها غضبة **** وهاجت المياه غطات لمدينة
شعلت النيران تاكل فالغابة ***** وحنا في لمحان و الصهد كلانا
حتى من الامطار جاتنا مقلوبة **** وصيف التصياف فيه شتينا
قسف المحصول و قسفت الصابة****والعام لي يجي ماذا ينقصنا
هاذي ثمار الشر واحنا حطابة **** من لفعال الشينة رانا فغبينا
بحنا بالفجور ولرذال مطلوبة **** وعبدنا السيات وبليس غوانا
اكثر الفساد بوابو مرغوبة **** الزنا واللواط يا الله تسترنا
هذا جيل قسيف. قسيف الجلابة ****شابات وشبان راهم في محنة

اتحزمت البنت عرات الركبة ****كشفت الجسد في وسط لمدينة
تفتن فالشباب راهم في غلبة ****ويا ربي تهديهم لطريق نبينا
الراجل بولادو عينه مسلوبة ****يخون الحريم ويثير الفتنة
كذا من ذالجيل ماليهم حسبة ***عاشو في لخباث ونساو السنة
والتجار ضحات تاكل فالربى ***استحلاو الحرام ونساو الفنا
البايع كذاب والشاري ذيبة ****يتصيد الفرص باغي غي يغنى
هذا وقت محان ومحانو صعبة***يا حليل المسكين قليل الفطنة
نطلبك يا اله مجيب الطلبة ****من ذالوقت الشين وانت تسلكنا
حشمتك بجاه النبي والصحابة ***تغفر لينا يالله وانت مولانا
وتغفر لما وخاوتي وتغفر لبا ****وتغفر لحبابي في كل مكانة
حشمتك بجاه الصالحين اهل النوبة ***تجعل قسمتي فالجنان وجنة
عبد الله معروف اسمي فيه البا ****بحوصي نكوتي هاذيك باينة
لشعرا كل مسلم والطلبة ****واهل الديوان كل والفنانة

و نختم بالصلاة على شريف النسبة ***شافع اماتو في يوم المحنة