** قصيــــــــدة أزنينة ° الادريسية ° **

قلبي ضاق ومالقيت الي يفاجيــه = اتهـلك بيه المحـايــن قـواتـــو

ضاري واسع كي البحريتنعت بيه = ولا مثـل الفـج هذ يـك انعـاتـــو

وذركة ولا قالي جات أتـنـويـــه = ومضيع ثانـي الي من حاجاتو

يا تمحاني وش ذ القلب أمنويـــه = متبـكـم مابــاح بالــي نـواتـــو

شاهي نقدى للمصيف انجول عليه = لراس العين امنين كبت خيراتو

انفاجي هم ان إزداد انــح عليــه = الواحـد شويـه يهمـل ساعـاتــو

ونبدى بسم الله قولي ننظم فيـــه = بأجمل ما غنى الشاعر ببياتـو

بالصلاة على النبي و على آليـه = مـول المعجـزات شفيع اماتــو

ذا وطني خير المدن ونفاخر بيه = امزخرف ومشيـد ة ثماراتـــو

ازنينة لا كان ذ الإسـم انوريــه = برالبركـات والخيـر اعطاتــو

من بكري مقصود والزيار تجيه = لاخــوان يجونا يضلو ويباتــو

ازنينة يا سامع كلامي ساعيــه = ذركه الدهر يعيد عنها ذكراتو

ازنينة اسم ان تقال و نلفض بيه = فتات الرومان من خير ابناتــو

من عهد الرومان ولا حذاه الهيه = و من قبل المسيح هووا ماتــو

وبعض يقول تعود من بربرولهيه = هذه البلدة نالت الإسـم اسعاتـو

بر البربر كانت زناتـــة تـمـليــه = من اقـدم زمـان هما حماتـــو

سليم وهـلال ثانــي سكـنــو فيـه = من قبل البـد ارنة عنها فاتــوا

ازنينة تاريخـها لا من يحصيــه = من قبل الميلاد لليـوم ابذاتـــو

محلا هذ البر من زارو يشتيـه = الخاطريرضى بيه تبرى علاتو

امشكل مثل الحوض وجبالوتحظيه = من أربع أركان تحلى شوفاتو

بــن صالح هـذاك نفــع الله بيــه = ولا أذى قلنا امحمد في ذاتـوا

كان على البـدارنة طالب وجيــه = بوشعــاله ظاهرة كـراماتـــو

سيداحمد بن يوب مايبعدش اعليه = يرحم ربي الي مساميهم ماتو

وقبة سيدي التونسي بانت من هيه = جيهة كاف الباز هاذيك انعاتو

وجاو الترك اعقابهم شوف لبنييه = ذركة راها ذاهبــــة أثاراتــو

وحكم الإستعمار باه انوضو ليــه = ذى حكم الغرات شفنا ويلاتـو

الإستعمارمنين جاء ذاالغاشي فيه = احتلو وطني ونهبــو خيراتــو

معركة سردون راها تشهد ليـــه = قداش ان شهيد عن وطني ماتو

وتحرر هذا الوطن ورجالو فيـه = سبع عروش من لفحول اتولاتو

كرمه والمسكين ثاني حضو بيه = سلاكين الي ازدادة محـنـاتــو

ازنينة بر الزوي و الناس تجيـه = وكذا من قـنـدوز فيها قـراتــو

الأميـر وزار ذ البـر اقعــد فيــه = ازنينه من كل خيرات اهداتـو

عبد القادر ذاك أسمه ضاهر بيه = ومقامو للأن باقــي حجراتـــو

ودعى دعوة لخالقوا وستاجب ليه = ربي هذ البر تكثــر خيـراتـــو

وبن ساعد حرفوش بالاسم نسميه = وعبد المالك هو السعيد بذاتو

أإمة في الدين راهم شاعــو بيــه = ربايين اجيــال بالعلم يهــاتـــو

المسجـد العتيـق هما كانـو فيــه = من شاو التأسيس رفعوراياتــو

وعبد القادر طاهري عالم فـقـيـه = زاهد ساجد عابد الليل ايبــاتــو

مول دعوة خير كامل شهدو ليه = نفـــع الله بيـه وبـكــرامــاتــــو

وسي عطية ذاك تلميذو يرضيـــه = قراه المنزول وحفض سوراتـو

أتخرج من ذ الـبلاد وسال عليــه = ومعـاه الكثيـر حيـيـن وماتـــو

وراؤول بوني ذ اليكول سماه عليه = الكشافة جات من بعـد اسعاتـو

لادريسيـة شايعـة ذا المركـز بيــه = رمز من التراث في ذكراياتـو

والمجاهد عمر ادريس أنتسب ليه = الادريسية نالت اسماه اداتــو

وفيها ثاني سي أحمد لمين أعنيه = زاويتــو قداش واحـد قراتـــو

هذ الراجل صاحب الفكروتنيبيه = مولى حكمـة شايعين احكاياتـو

وبن بن حمزه سي بوبكرسلم ليه = لركاب وزيا ر قـاع اتعنـاتــــو

بيت الحضرة دايم لخوان تجيه = بالذكرو تقصاد تحلى سهراتو

هــذ بــر الصالحين امسلم ليـــه = اينفعـنا ربـي بخيـرة ولاتـــــو

مول النية حاجتو مقظيــة فيـــه = انوي الخيرتصيب تجني ثمراتو

يتهنى في حالتــو همـو يخطيــه = يتلا شى همــو وتسعـــد حياتـــو

ويفرج ربي على لي ضاقت بيه = يتهنى ويـــزول عنــو تنهاتـــــو

ويحفظ هذ الوطن كامل بالي فيه = ويجعل ناسو صاينينو حماتــو

وكفيهم شــرالبلاء والي ياذيــه = ويفيظ رزقو فيه تكثر خيراتــو

يا سامع هذ الكلام اتمعـن فـيــه = شوف لكنهو لا تشوفش لآبياتو

وافهم معنى القول يظهرلك خافيه = واشرح لفضو باه تجني غلاتـو

أدونيس القول جابـو بالتوجيــه = محمـد غـلام ذ الفكــرة جاتـــو

جاتو غيرة قال وطني نرفع بيه = يعلى شانو باه تخلد ذ كـراتـــو

ودايم وطني غير وطني مانبغيه = قصر أزنينـة شايعيـن احكاياتــو

بن لبقع جاب الكلام يعـد ل فيـه = عبد القـــادر يا سامع لأبيـاتـــو

البدوي في الريف باباه امربيه = وازنينة هي المكــان ابـذاتـــو

والشاعر هزيل شارك بمعانيه = غيمـــو ســـدى راه أرواقـاتــو

ومحمد حرفوش ذ الشاعرسميه = باحث في التاريخ قال رواياتو

و عبد القادرجاب قولوشارك بيه = بالشاعرمعروف قول وصيفاتو

واذى قلت قوادري علي حيـيـه = حقـق في المقال وافحص أبياتــــــو

في النسب لسي أحمد لمين يجيه = جدو موسى بن احسن ذوك أنعاتـو

وقدوري ولد الوطن واترابي فيه = بن صالح مادي الاسم وصيفاتــو

نشكرهم شكــر المحبة ونوفيـــه = علـى ماقــــدم كل آخــــر ببياتـــو

و الصلاة على النبي وعلى آليه = مول المعجـزات شفيــع امـاتــــو


***** محمد أدونيس الجـزائــــر *****

بارك الله فيك

سي بوبكر ابن بن حمزة هو أحد شيوخ الصوفية وصاحب زاوية في المدينة وأحد رجالاتها رحمة الله عليه

أرجوا من الأخ الكريم موافاتنا بكل ما يعرفه عن المجاهد سي بوبكر ابن بن حمزة
وشكزا لك مسبقا