يا نفسي واش بيك راكي تأمري

بسم الله الرحمان الرحيم.والصلاة والسلام على الهادي الامين خير المرسلين وخاتم النبيئين.ارسل رحمة للعالمين.
اهدي احبابي في المنتدى هذه القصيدة .
والتي هي بعنوان
يا نفسي واش بيك راكي تأمري

يا نفسي وعلاش راكي تأمري **** تبعتيي الشيطان ما يبغي وهواه

انا تايق فيك وأنت تغدري **** دخلتيني في  بحر  غامق  لياه

انا زاهي بيك ونقول ياصغري **** حسبت أنا ذالصغر دايم لمولاه

يامي نقصان تمشي  من  عمري****وقلت انا ذالوعد دايم يا حصراه

اشتد العضد  قلت هذا  فخري **** الصحة والصغر نحقق ما نرجاه

امرعرع  صغير زايغ ببصري **** تابع الملعون مستعجب بلغاه

فارح  بشبابي  و انايا  عزري **** تابع كل لي  بغا عقلي وشتاه

تابع الملعون   هايم  ما  ندري**** ونسيت القران وما قال الله

انسيت الصلاة ونواض الفجري**** في هذاك الوقت نومي يا محلاه

هملت الخمسة وهملني فكري *** هاذ ذالوقت  يروح موحال لا نقاه

تابع الدنيا و موراها نجري****هاذ الجري طويل والجاري عياه

حالك يا دنيا صعيبة تغدري*** يا ويح لي تاق في وادك داه

بمحاسن تزيان هوالك تمكري** ياويح لي غواه جمالك وهواه

هذا حالي فيك سودتي زهري****رميتيني في واد غارق يا معتاه

لعبتي بشبابي وضيعتي صغري *** ومشالي فاللهو راه بليس داه

مع احبابي واهلي طيحتي قدري****عافوني لصحاب قالو ذاك علاه

حشمتك بالله يا نفسي هدري**** عبدالله كفاه  إيجاوب مولاه

عييت نراود فيك يا نفسي صبري****شدي في مولاك راه الحق معاه

عييت نخالي فيك نفهم و نقري*** طاعة ربي تنال من حفظه ورضاه

انت خبيتة وللشر  تجري****تديني  للفعل  لي بغضو ونهاه

قوليلي كفاش نجاوب في قبري**** عند الملكين سؤالي نرجاه

منكر ونكير ثمة تحضري* ***يتلف كلامي ونولي مهماه

بعملك يانفس ظلمتي قبري****لاشمعة لاضو لاقنديل ضواه

في هذاك اليوم لله تسيري*** الخشبة والروح والعمل معاه

جوابك كفاش في يوم الحشري****فيهذاك اليوم يا وعدي معتاه

في هذاك اليوم ثمة تظهري****مكشوفة الجسد لاستر وغطاه

كتابك بين يديك تشوفي تنظري****و جميع لي دار شي ثمة يلقاه

ما ينفع لا مال ثمة يا عمري****وما ينفعش النسب ما ينفعش الجاه

ما ينفعش الكذب بحواس تكري**** ويقولو للرب هاذ الشي درناه

ميزانك حسنات بيهم تنعبري****يا سعد لي دار الخير وخلاه

نفسيي يا  نفسي ترجاي الباري****حتى الولد ثمة كا ينكر باه

يلا تدرتي شي خير ثمة تجبري****تدخلي في شفاعة الطاهر وحماه

يلا درتي الغير لازم تصبري****طلبي ربي كان يسمح لك برضاه

يا ربي تغفر تمحي لي وزري****تغفرلي ذنبي غفرانك نرجاه

يا سيدي ربي ع ليك انا عاري**** محمد  جبناه جبتهلك فالجاه

لا تجعل فالنار ثمة قراري****ذاك السكن اصعيب يا وعدي محماه

هاذ العبد ضعيف وانتيا داري**** فالجنة  يا رب تجعله مأواه

مولى  ذالكلمات صديقي بكري****عبد الله معروف سيد الشيخ باه

صلاة الرسول محلاها ذكري**** بالسلام ختمت على بن عبد الله

 تمت بتوفيق الله.
بقلم عبد الله بحوصي

دائما متميز الأخ عبد الله بحوصي وفي كل مرة يحصل لي الشرف فأكون أول المتلقين
لهداياه المتكررة والتي هي بمثابة نصائح فكلمات الشكر تعجز عن الوفاء ولكن قوة
الأخوة والصداقة تجبر كل نقص .
هاذ العبد ضعيف وانتيا داري****ويبغيك فالجنة تجعله مأواه
مول الكلمات صديقي بكري****عبد الله معروف سيد الشيخ باه
صلاة الرسول محلاها ذكري****ونختم بالسلام على بن عبد الله

شكرا لكم على مروركم .
الاخ زيدوري.الاخ فقير بوشيخي.
ولي الشرف ان يقرا قصائدي اناس امثالكم.
اتمنى ان يكون عملنا وعملكم خالصا لوجهه الكريم.سبحانه ربي العظيم.

بسم والصلاة والسلام على رسول الله .
اللهم ادخل هذا العام الجديد على اخوتنا بالخير واليمن والبركة والصحة والنعمة والهناء والخير الوفير ان شاء الله .

عبد الله بحوصي كتب:بسم والصلاة والسلام على رسول الله .
اللهم ادخل هذا العام الجديد على اخوتنا بالخير واليمن والبركة والصحة والنعمة والهناء والخير الوفير ان شاء الله .

آمين

عبد الله بحوصي كتب:شكرا  لكم على  مروركم .
الاخ زيدوري.الاخ فقير  بوشيخي.
ولي  الشرف  ان  يقرا  قصائدي  اناس  امثالكم.
اتمنى  ان  يكون  عملنا  وعملكم  خالصا لوجهه الكريم.سبحانه ربي العظيم.

آمين رب العالمين