هذا هو حال بعض الشباب

هذا هو حال بعض الشباب
ياربي يا مجيب ولي طلبك ما يخيب..سهلي كل صعيب رحمتك نرجاها
يا حي يا رقيب يا مسهل كل صعيب..يا لي ما كيفك حبيب محبتك محلاها
يا قريب يا رقيب و يا العالم ما فالغيب.ويا الراقب بذنوبي الظاهرة و خفاها
سلكني يا ربي من شر بليس الزغبي... ونعبا انا بعيوبي و نفسي و هواها
سلكني يا سلاك نسلك من شرالهلاك .لا من غيرك فكاك من النار وحطبها
سلكني يا ربي من ذ الجيل التالف ...راه فالدين يخالف و الحرم تعداها
سلكني من جيل اليوم تالف هامل غير يهوم....متعني بخصال الروم غادي يقلد فهواها
شفت الولد يسب اباه ابلكلام لي معتاه..ونسى قول رسول الله ولوصاية لي وصاها
قال نطيعو الوالدين باش نكونو فائزين..فالدنيا هنايا والدين و ميمتي نسعد برضاها
وحنا ذالوقت قلبناه والدين السمح خطيناه...مشينا مع بليس و تبعناه اطريق هنايا مظلمها
انا بعيني شفت الولد على والديه يتمرد..للعشرة يصبح راقد يفيق ميمتو يمرمدها
مزال صغير .من الصبيان مبلي بالسكرة والدخان..في قنت الحيط يبرم جوان و يسهر ليالي مطولها
ما بغى المدرسة والقسم. وما بغى يقرى يتعلم..فالاعدادي ثمة بقى ثم .ولي يحفظها يتلفها
ما بغى يتعلم صنعة.تابع غي الكاس والقرعة..بعد الكبر وين الرجعة.صغر حياتو ضيعها
ما بغى يتعلم الدين.و يحفظ الكتاب المبين....ويحفظ سنة الامين و هاذ الامة ينفعها
بعد ما يكون زوين وظريف. يتعلم السكرة والكيف....بعد القوة يعود ضعيف حتى سنانو يهشمها
يتعلم غير الدروة.ويبات هامل غي برة....يتصاحب الشفارة.والخدمة الشينة يخدمها
تلقاه صغير ورافد موس.شوفو لذالجيل المنحوس....بالكنينة عايش مهووس.يبيع القش ويشريها
ويلا تخص يدير نهار.ينوض روينة فالدار....يسب ويشتم وسط الدار .حتى ميمتو يضربها
ما يحترم دار الجار.ما يحترم ناس كبار....و ايسب الرب بالجهار.هاذ الكلمة معظمها
من صغره يخرج شفار.يخون القش من الدار....من بعد يطاما للجار.هاذ البلية مصعبها
ما يخدم عايش بطال.هايم عاشق فالخيال....عقلو متخبل تخبال .والمشاكيل يبغيها
كاسب تلفون مليح.شاريه بثمن صحيح....مسرجي بالهاوى والريح.الموسيقى وماليها.
داير في وذنو خيطان.وجالس تحت الحيطان....يهز راسو كي السكران.والموسيقى يعشقها
يبات يهالي مع لبنات.ويكتب فالميساجات....لوكان هوما عفيفات.حتى وحدة ما يعرفها
يسرجي ويهدر بالساعات.ويتبادلو كلمات....من بعد يديرو علاقات.ويبليس متوسطها
هذا هو حال الشباب.ما في ذ الحال استغراب....لازم نرجعو لصواب.والامة نصلحوها
التربية هي الاساس.وصى عليها خير الناس....كفاش الدرا بلا ساس تعليها وتسكن فيها
كلامي هذا غي معنى .بغيتك خويا تفهمنا....ربي ولدك تتهنى.وحتى الامة تهنيها
اصلح انت.ونصلح انا.باش نصلحو مجمعنا....نديرو امة مزيانة.والنبي يرضى عليها
عبد الله مولى لبيات.جاب كلامه بالثبات....يا ربي تمحي السيات.وعليا ميمتي ترضيها
نختم كلامي بالصلاة.على خير المخلوقات....محمد شافع لمات هو لي يشفع فيها.

بقلم عبد الله بحوصي

[
الله يرضي عليك الوالدة كما ختمت قصيدتك ويتقبل دعاءك لإصلاح هذه الفئة من
المجتمع والغالية علينا والتي جاءت هذه الأبيات بمثابة المرآة العاكسة لحالهــــــــا
ولا يختلف إثنان في هذا الواقع المر والذي يزداد اتساعا يوما بعد يوم وسبل العلاج
والتصدي لتلك الظواهر المرضية ضعيفة إذا لم نقل منعدمة وبالتالي لايسعنـــا إلا
ترديد المثل الشعبي عند إخواننا في مصر (العين بصيرة واليد قصيرة)

سلامي يا أخي

ما أروع قصيدتك لو تعيد نظم وزنها،


ملاحظة: هذا راي هاوٍ و ليس خبير.

سيدي انمار الثالث كتب.ما أروع قصيدتك لو تعيد نظم وزنها[color=red][/color]
هل تقصد حرف القافية والروي ام شيئ اخر.
ومرحبا بمداخلاتك مرة اخرى